wildyaks
Wildyaks
>
སྔགས་པའི་གཡོ་རྒྱུ།
སྔགས་པའི་གཡོ་རྒྱུ།
26/07/2016 22:35
གནའ་སྔ་མོ་ཞིག་ན། རྒྱ་གར་གྱི་ཆུ་བོ་གང་གཱའི་འགྲམ་དུ་སྔགས་པ་ཞིག་ཡོད། སྔགས་པ་དེས་ངག་སྡོམ་བླངས་ཏེ་ནམ་རྒྱུན་གཞན་ལ་ངག་ཐོག་ནས་སྐད་ཆ་མི་བཤད་པར། ལག་བརྡ་དང་མཆུ་བརྡ་བྱས་ནས་བརྡ་སྤྲོད་བཞིན་ཡོད་པ་རེད། དེར་བརྟེན།སྔགས་པ་དེར་ཡུལ་དེ་ན་སྐད་གྲགས་ཀྱང་ཆེན་པོ་ཆགས་ཡོད་པ་མ་ཟད།ཁོང་ལ་སློབ་མ་དང་དད་པ་བྱེད་མཁན་ཡང་ཧ་ཅང་མང་པོ་ཡོད།
ཉིན་ཞིག་སྔགས་པ་དེ་ཉེ་འགྲམ་གྱི་གྲོང་གསེབ་ཅིག་ཏུ་བསོད་སྙོམས་ལ་ཕྱིན། ཁོས་ཁྱིམ་ཚང་ཞིག་ལ་བསོད་སྙོམས་བསླང་། བསོད་སྙོམས་སྟེར་དུ་ཡོང་མཁན་དེ་བུ་མོ་ཧ་ཅང་ཡག་མ་ཞིག་ཡིན། སྔགས་པས་བུ་མོ་དེ་མཐོང་བ་དང་རང་དབང་མེད་པར་སེམས་པ་མོའི་ཐོག་ལ་ཤོར་ཏེ། ངག་སྡོམ་བླངས་ཡོད་པའང་བརྗེད་དེ། ཁ་ནས། ཨ་ལ་ལ། ཇི་འདྲའི་བུ་མོ་ཡག་མ་ཞིག་རེད་ཅེས་ངག་ནས་ཤོར།
བུ་མོའི་ཕ་རྒན་གྱིས་སྔགས་པས་སྐད་ཆ་བཤད་པ་ཐོས་ཏེ། མི་དེ་སུ་ཞིག་ཡིན་ན་བསམ་ནས་ལྟ་རུ་ཡོང་། སྐབས་དེར་སྔགས་པ་དེའི་སེམས་ལ། ད་འགྲིག་མ་སོང་བསམ་སྟེ་ཕྱིར་རང་གི་སྡོད་གནས་སུ་རྒྱུགས།
དེ་ནས་བུ་མོའི་ཕ་རྒན་གྱིས་སྔགས་པའི་རྗེས་དེད་ནས་སྔགས་པ་འདུག་སར་སོང་སྟེ། ཉམ་ཐག་འགྲོ་བའི་མགོན་སྐྱབས། ངག་སྡོམ་སྲུང་བའི་སྔགས་འཆང་།དེ་རིང་བདག་གི་བུ་མོར། སྐད་ཆ་བཤད་དོན་ཅི་ཡིན་ཞེས་དྲིས། སྔགས་པ་དེས་གང་ཡང་མ་བྱུང་ཁུལ་བྱས་ཏེ། ཁ་ནས། ཨོཾ་ཨ་ཧཱུཾ། ཨོཾ་ཨ་ཧཱུཾ། ཞེས་འདོན་ཞོར་དུ་ལན་ཅི་ཡང་མ་བཏབ།
དེ་ནས་བུ་མོའི་ཕ་རྒན་གྱིས་ཡང་བསྐྱར། སྔགས་འཆང་ལགས། ཁྱེད་ཀྱིས་ཕྲན་གྱི་བུ་མོར་སྐད་ཆ་བཤད་པ་ངས་དངོས་སུ་ཐོས་བྱུང་། ད་ཁྱོད་ཀྱིས་ངག་སྡོམ་ཤོར་ཚར་བ་མ་རེད་དམ་ཞེས་དྲིས་པ་ན། སྔགས་པ་ཁོང་ཁྲོ་ལངས་ཏེ། ངའི་ངག་སྡོམ་ཤོར་བའི་སྡུག་ཉེས་ཡོད་ཚད་ཁྱོད་ཀྱི་བུ་མོ་ལ་ཡོད་ཅེས་ལན་བཏབ།
བུ་མོའི་ཕ་རྒན་ཡ་མཚན་སྐྱེས་ནས་ངའི་བུ་མོས་སྡུག་ཉེས་འཁུར་དགོས་པའི་རྒྱུ་མཚན་ག་རེ་རེད་ཅེས་དྲིས། སྔགས་པའི་མིག་གཉིས་ཕ་རྒན་གྱི་གདོང་ལ་གྱེར་ཏེ། ཡ་རྒད་པོ། ཁྱོད་མི་བསོད་ཟད་ཅིག་རེད། ཁྱོད་ཀྱི་བུ་མོ་དེ་བཀྲ་མ་ཤིས་པ་ཞིག་རེད། གལ་སྲིད་ཁྱོད་ཀྱི་བུ་མོས་ཆང་ས་བརྒྱབ་པ་ཡིན་ན། ཁྱོད་ཀྱི་ནང་ལ་རྐྱེན་ངན་གོད་ཆག་འབྱུང་བ་མ་ཟད། ཁྱོད་ཀྱི་ཚེ་ལ་བར་ཆད་འབྱུང་ངེས་རེད་ཅེས་འཇིགས་སྣང་བསྐུལ།
བུ་མོའི་ཕ་རྒན་སྐྲག་ཅིང་འདར་ནས། ལག་གཉིས་ཐལ་མོ་སྦྱར་ཞིང་པུས་མོ་གཉིས་ས་ལ་བཙུགས་ཏེ། སྔགས་འཆང་དམ་པ། བདག་གི་མགོན་སྐྱབས། བདག་ཚེ་འདིའི་བར་ཆད་ལས་ཐར་བར་གསོལ་ཞེས་ཞུ་བ་ཡང་ནས་ཡང་དུ་བྱས།སྐབས་དེར་སྔགས་པ་དེའི་སེམས་ལ། ད་བུ་མོ་མཛེས་མ་དེ་བདག་ལ་དབང་སོང་བསམ་པ་དང་། ཁ་ནས། ལྷ་ཆེན་དབང་ཕྱུག་ལ་གསོལ་བ་འདེབས། རྐྱེན་ངན་བར་ཆད་ཞི་ཤོག་ཅེས་མིག་གཉིས་ཀྱིས་ནམ་མཁར་བལྟས་ཏེ་ཁ་ནས། ཧཱུཾང་ཧཱུཾང་ཧཱུཾང་ཕཊ་ཕཌ་ཅེས་གཟུངས་སྔགས་བགྲང་ཁུལ་བྱས་ཏེ་ན་རེ། ཁྱོད་ཀྱི་ཚེའི་བར་ཆད་ཞི་བ་ལ། ཐབས་ཤེས་གཅིག་མ་གཏོགས་མི་འདུག་ཅེས་བཤད། རྒན་པོ་དེས་ངས་ག་རེ་ཡིན་ན་བློས་གཏོང་ཐུབ་ཅེས་ལན་བཏབ།
སྔགས་པ་དེའི་སེམས་ལ་འདོད་པའི་མེ་ལྕེ་འབར་ཞོར་དུ། དེས་ན་ཁྱོད་ཀྱིས་རང་གི་བུ་མོ་བློས་གཏོང་ཨེ་ཐུབ་ཅེས་དྲིས། བུ་མོའི་ཕ་རྒན་གྱིས་ང་རང་ཉིད་ཚེ་འདིའི་བར་ཆད་ལས་གྲོལ་ཐུབ་ན། བུ་མོ་བློས་བཏང་ཡང་འགྱོད་པ་མེད་ཅེས་ལན་བཏབ། སྔགས་པ་ན་རེ། ཡ་དེ་ན་བཟང་གི། བུ་མོ་ཤོང་སའི་ཤིང་སྒམ་ཞིག་བཟོས། ཁྱེད་ཚང་ལ་ཡོད་པའི་རིན་པོ་ཆེ་ཚང་མ་བུ་མོ་དང་མཉམ་དུ་འཇོག་དགོས། དོ་ནུབ་ས་རུབ་ལ་ཉེ་བ་ན། སྒམ་དེ་ཆུ་ནང་དུ་འཕེན་དགོས་ཞེས་བརྗོད།
དེ་ནས་བུ་མོའི་ཕ་རྒན་ནང་ལ་སོང་སྟེ། རང་གི་བུ་མོ་ཤོང་སའི་ཤིང་སྒམ་ཞིག་བཟོས། དེའིི་ནང་དུ་རང་གི་བུ་མོ་དང་རིན་པོ་ཆེ་ཚང་མ་བཞག། ཉམ་ཆུང་བའི་བུ་མོས་ཞུ་བ་ཇི་ལྟར་བྱས་ནའང་། རང་འདོད་ཚ་བའི་ཕ་རྒན་གྱིས་མ་ཉན་པར་བཙན་གྱིས་བུ་མོ་སྒམ་ནང་དུ་བཅུག
དགོང་མོ་ས་རུབ་ལ་ཉེ་བ་ན། ཡུལ་དེའི་རྒྱལ་བོའི་སྲས་དང་འཁོར་གཡོག་ཁ་ཤས་རི་དྭགས་བརྔོན་དུ་སོང་ནས་ཕྱིེར་ནང་ལ་ལོག་པའི་ལམ་བར་དུ། རྒན་པོས་ཤིང་སྒམ་ཆུ་ནང་ལ་གཡུག་བཞིན་པ་མཐོང་ནས་རྒྱལ་སྲས་ཀྱིས་གཡོག་པོ་ཚོར་སྒམ་དེ་ཡར་ཆུ་ཁར་ལེན་དུ་བཅུག དེ་ནས་ཤིང་སྒམ་ཁ་ཕྱེ་བ་ན། སྒམ་དེའི་ནང་ན་བུ་མོ་ཡག་མ་ལྟ་ན་སྡུག་པ་ཞིག་ཡོད་པ་མཐོང་།
དེ་ནས་རྒྱལ་སྲས་ཀྱིས་བུ་མོ་ལ་སྐད་ཆ་དྲིས་པ་དང་། བུ་མོས་མགོ་མཇུག་བར་གསུམ་གྱི་བྱུང་རིམ་དང་གནས་ཚུལ་ཆ་ཚང་བཤད། རྒྱས་སྲས་དེ་བུ་མོའི་མཛེས་སྡུག་ལ་ཞེན་ཆགས་ཏེ་ཕོ་བྲང་དུ་གདན་དྲངས་པ་དང་། ཤིང་སྒམ་ནང་དུ་བུ་མོའི་ཚབ་ལ་སྟག་གཅིག་བཅུག་ནས་སྒམ་གྱི་སྒོ་བརྒྱབ། དེ་ནས་སྒམ་མར་ཆུ་ནང་གཡུགས།
སྔགས་རྒན་གྱིས་རང་གི་སློབ་མ་རྣམས་ལ། མདང་དགོང་ངའི་རྨི་ལམ་ནང་དུ་ཀླུའི་རྒྱལ་པོས་ང་ལ་ཤིང་སྒམ་ཞིག་ཕུལ་བ་རྨིས་བྱུང་། དོ་ནུབ་ཁྱེད་རྣམས་ཆུ་ཁ་ལ་སོང་ནས་ལྟོས་དང་།གལ་སྲིད་སྒམ་ཞིག་རྙེད་པ་ཡིན་ན། སྒམ་ཁ་རྩ་བ་ནས་ཕྱེ་མི་ཉན་ཞེས་བཤད།
སློབ་མ་རྣམས་ཆུ་ཁར་ཐོན་མ་ཐག། སྒམ་ཞིག་ཆུས་ཁུར་ནས་ཡོང་གི་ཡོད་པ་མཐོང་བ་དང་། སློབ་མ་རྣམས་ཀྱིས་སྔགས་རྒན་ལ་མི་བྱེད་པའི་དད་པ་སྐྱེས་ཞོར།སྒམ་དེ་ཁོང་གཟིམ་སའི་ཁང་པའི་ནང་དུ་བསྐྱལ།
དེ་ནས་སྔགས་རྒན་གྱིས་བསམ་དོན་ཐམས་ཅད་ཡོངས་སུ་འགྲུབ་སོང་ཞེས་ཁེར་ལབ་བྱེད་ཞོར་དུ། སྒམ་ཁ་ཕྱེ་བ་ན། སྒམ་ནང་གི་སྟག་དེ་ཡར་མཆོང་ཐེངས་གཅིག་གིས་སྔགས་པའི་སྟེང་ལ་མཆོང་ནས་སྔགས་པ་དེ་བསད་པ་རེད།
བུ་མོ་ཡག་མ་དེ་རྒྱལ་སྲས་ཀྱི་བཙུན་མོར་བསུས་ཏེ་མི་ཚེ་སྐྱིད་པོ་རོལ།ཕ་རྒན་གྱི་བྱ་སྤྱོད་མི་ཚོས་ཤེས་ནས་ཚེ་གང་བོར་མིས་འཕྱ་སྨོད་བྱེད་ཡུལ་དུ་གྱུར། སྔགས་པའི་གཡོ་རྒྱུ་དང་འདོད་རྔམ་ལ་མི་རྣམས་སྐྱུག་ལོག་ནས་ན་རེ། བསམ་པ་གཞན་ལ་གནག་ན། རྒྱུ་འབྲས་རང་ལ་འཁོར་ཡོང་།ཟེར་བ་ཅི་མ་བདེན་ཞེས་ཡོངས་སུ་གྲགས་སོ།།
Back
Menu
གློག་ཀླད་ལས་འཆར། Computer Project
བྱིས་སྐྱོང་བསླབ་བྱ།
སྐད་ཡིག་བསླབ་བྱ། Quotes
བསླབ་བྱ་གྲགས་ཆེན། Famous Quotes
ང་ཚོའི་སྐོར། About us
བྱིས་སྐྱོང་སློབ་གསོའི་མན་ངག་གཅེས་བཏུས།
བྱིས་པའི་གླུ་གཞས། Children's songs
བྱིས་པའི་བརྙན་འཕྲིན། Videos
ཐ་སྙད་གསར་བ།new vocabulary
བོད་ཡིག་སྦྱོང་ས། Learning Tibetan
སྒྲ་ལྡན་བྱིས་སྒྲུང་། Stories on MP3
འདྲ་པར། Event Photos
ཚོང་ཁང་། Shopping
ལོ་རེའི་སྙན་ཐོ། Annual report
བྱ་འགུལ། Events
སྣ་ཚོགས། Variety
གཡག་རྒོད་དང་འབྲེལ་བའི་གསར་འགྱྱར། Wildyaks in the news
Search site
Search site
Contact
Administrator
416-453-9887
admin@wildyaks.com
Homepage
Site map
RSS
Print