གཡག་རྒོད་བྱིས་པའི་སློབ་གསོའི་ལས་གཞིའི་ཆ་ཤས་ཏེ་གཡག་རྒོད་དཔེ་སྐྲུན་ཁང་གིས། ད་ལོའི་སྤྱི་ཟླ་བདུན་པའི་ནང་། ༼རྨི་ལམ་དང་མདུན་ལམ་འཚོལ་བ་༽ཞེས་པའི་རི་མོ་ཅན་གྱི་དབྱིན་བོད་ཤན་སྦྱར་གྱི་བྱིས་པའི་ཀློག་དེབ་ཅིག་དཔར་བསྐྲུན་གྱིས། སྤྱི་ཟླ་བརྒྱད་པའི་ནང་བོད་ཕྱི་ནང་གཉིས་སུ་དེབ་གྲངས་༢༠༠༠ རིན་མེད་དུ་བཀྲམ་ཡོད།
ཀློག་དེབ་དཔར་བསྐྲུན་ལ་མ་དངུལ་ཆ་ཚང་ཨ་རིའི་ནེའུ་ཡོག་གི་རྭ་ལ་བོད་ཀྱི་ཐེབས་རྩ་ཁང་ནས་སྦྱིན་གཏོང་གནང་བར། ཐེབས་རྩ་ཁང་འདི་ལ་སྙིང་ཐག་པ་ནས་བཀའ་དྲིན་ཆེ་ཞུ།
བྱིས་པའི་ཀློག་དེབ་དེ་འབྲི་བའི་བློ་བསྐྱེད་ཐོག་མ་དེ་སྤྱི་ལོ་༢༠༠༤ ལོར་ཕྲན་དང་བཟའ་ཟླ་ཇོ་ས་ལེ་གཉིས་ཕ་ཡུལ་དུ་གཉེན་འཕྲད་ལ་ཕྱིན་པའི་སྐབས་སུ་བྱུང་བ་དང་། དེབ་འབྲི་བའི་བརྒྱུད་རིམ་ཁྲོད་སློབ་སྟོན་དང་བློ་འདྲི་ཞུ་ས་ནི། ཊོ་རན་ཊོའི་མཐོ་སློབ་ཁག་ཏུ་མཛུབ་སྟོན་སློབ་གསོའི་བྱ་བར་གཉེར་གྱིན་པའི་ཕྲན་གྱི་བཟའ་ཟླ་ཇོས་ལེ་དང་། གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་ཏུ་འབྲེལ་འཐུད་ཀྱི་བྱ་བ་གཉེར་གྱིན་པའི་ཇོས་ལེའི་སྤུན་སུ་ཊ་སྤུ། བླ་བྲང་སྡོང་རྒྱལ་སོགས་ཡིན་པའི་ཁོང་རྣམ་པར་བཀའ་དྲིན་ཆེ་ཞུ།
བོད་ཡིག་ཞུ་དག་དང་ལེགས་བཅོས་ལས་དོན་ཁྲོད་བླ་བྲང་སྡོང་རྒྱལ་དང་རྩོམ་པ་བོ་རྨེ་བ་བསོད་ནམས་མགོན་པོ། རྩོམ་པ་པོ་ལྷ་ཆབ་སྦྱིན་པ། རྩོམ་པ་མོ་ལྕགས་མོ་འཚོ་སོགས་ཡིན་ཞིང་། ཁོང་རྣམ་པར་ཡང་བཀའ་དྲིན་ཆེ་ཞུ། ལྷག་པར་དུ་ལྕགས་མོ་འཚོ་དང་ལྷ་ཆབ་སྦྱིན་པ་གཉིས་ལ་མཚོན་ན་གཡག་རྒོད་དྲ་བ་དང་འབྲེལ་བའི་བྱིས་པའི་སློབ་གསོའི་ལས་འཆར་རྣམས། རང་གི་ཉིན་རེའི་ལས་ཀའི་ཞོར་དུ། རིན་ཐང་བྲལ་བའི་དུས་ཚོད་ཧ་ཅང་མང་བོ་ཁེ་ཕན་སྐར་གང་མེད་པར་བཏང་དང་གཏོང་བཞིན་ཡོད་པས་བཀའ་དྲིན་ཆེ་ཞུ།
དབྱིན་བསྒྱུར་གྱི་རོགས་རམ་དང་ཞུ་དག ལེགས་བཅོས་སོགས་ལས་ཀ་ཆ་ཚང་ཕྲན་གྱི་བཟའ་ཟླ་ཇོས་ལེ་དང་སྤུན་ཆུང་སུ་ཊ་སྤུ་གཉིས་ཀྱིས་གནང་བ་དང་།ཀློག་དེབ་འདིའི་སྤྱི་ཁོག་བསྒྲིགས་པ་དང་། དཔེ་དེབ་དཔར་སྐྲུན་དང་འབྲེལ་བའི་དབྱིན་ཇིའི་ལས་ཀ་ཕལ་ཆེར་ཇོས་ལེས་བྱས་ཡོད་པས་ཁོང་སྤུན་མཆེད་གཉིས་ལ་ཡང་ཡང་བཀའ་དྲིན་ཆེ་ཞུ།
དཔེ་དེབ་གྱི་མདུན་རྒྱབ་ཇུས་འགོད་པ་དང་པར་བཟོ་བ་རྨེ་བ་བསྟན་འཛིན་ཡིན་པས་ཁོང་ལ་བཀའ་དྲིན་ཆེ་ཞུ།
དཔེ་དེབ་འགྲེམ་སྤེལ་གྱི་ལས་དོན་ལ་རོགས་རམ་གནང་མཁན་རྣམས་ནི། ལྕགས་མོ་འཚོ་དང་། ཇོས་ལེ། མཚོ་སྔོན་འཇམ་དབྱངས། རྔ་རྒོད་ཡོན་ཏན། འབྲུག་ཆུའི་འཇམ་དབྱངས། དཔའ་ལུང་བསྟན་པ། རྔ་བ་དཔལ་ལྡན། ལམ་བདེན་སོགས་ཡིན་པས་ཁོང་རྣམས་ལ་བཀའ་དྲིན་ཆེ་ཞུ།
མིང་དངོས་སུ་འབྲི་མ་བདེ་བའི་དཔེ་དེབ་འགྲེམ་སྤེལ་གྱི་ལས་དོན་ལ་རོགས་སྐྱོར་བྱེད་མཁན་གྱི་ཚོགས་སྡེ་དང་སྒེར་བ་ཚང་མ་ལའང་བཀའ་དྲིན་ཆེ་ཞུ།
མི་རིགས་ཀྱི་ངོ་བོ་ཡུན་རིང་གནས་ཐབས་དང་བོད་ཀྱི་སྐད་ཡིག་གི་སྲོག་རྩ་སྔར་བཞིན་བརྟན་པ། ལྷག་པར་བོད་མིའི་སྤྱི་ཚོགས་ཁྲོད་བོད་རང་གི་རིག་གནས་ཀྱི་རིན་ཐང་དང་འབྲེལ་བའི་ན་ཆུང་བྱིས་པའི་སློབ་གསོ་རྒྱུན་འཛིན་དང་དར་སྤེལ་གྱི་དམིགས་འདུན་ཁོ་ན་བསམ་ནས་ད་བར་རྒྱབ་སྐྱོར་གནང་མཁན་གོངབརྗོད་ལྷག་བསམ་ཅན་ཡོངས་ལ་བསྐྱར་དུ་བཀའ་དྲིན་ཆེ་ཞུ། བདག་ཉིད་ཡོད་པ་མ་ཡིན་ན། བདག་གི་ཡོད་པ་ག་ལ་འགྱུར་ཞེས་གསུང་བ་ལྟར། ཁོང་རྣམ་པའི་ལྷག་བསམ་དང་རོགས་སྐྱོར་མེད་ན།༼རྨི་ལམ་དང་མདུན་ལམ་འཚོལ་བ་༽ཞེས་པའི་དཔེ་དེབ་ད་ལྟའང་རྔ་བ་མཁས་གྲུབ་གྱི་རྨི་ལམ་སྟོང་བའི་ཁྲོད་ལྷག་སྲིད་པ་ཁ་ཚོད་་གཅོད་ཆོག
བྱིས་སྒྲུང་འདི་འབྲི་བའི་གནས་སྐབས་དེར། སློབ་སྦྱོང་དང་ཉམས་མྱོང་གང་གི་ཆ་ནས་རང་གི་འདོད་བློ་ཁེངས་བ་ཞིག་མ་མཆིས་ནའང་། སྐབས་དེའི་བོད་སྤྱི་ཚོགས་ཀྱི་བསམ་བློའི་ཁ་ཕྱོགས་དང་དོ་ཁུར་གནང་ཡུལ་གྱི་བྱ་བཞག་རྣམས་རྩ་བར་བཟུང་ནས། བྱ་བཞག་དེ་དག་དང་འབྲེལ་བའི་སྒེར་ཀྱི་ལྟ་ཚུལ་དང་བསམ་ཚུལ་རེ་འགའ་ཟུང་འབྲེལ་གྱིས་ཀློག་དེབ་འདིའི་བརྗོད་བྱར་བཟུང་ཡོད།
བྱིས་སྒྲུང་འདིའི་ནང་གཙོ་བོ་བོད་ཀྱི་ཐུན་མོང་མ་ཡིན་པའི་རྒན་བཀུར་གཞོན་བྱམས་ཀྱི་གོམས་གཤིས་དང་། ཡ་རབས་སྤྱོད་བཟང་། བྱམས་སྙིང་རྗེ། ལས་རྒྱུ་འབྲས། དད་པ་དང་སྙིང་རུས་སོགས་སྙིང་དོན་དུ་བཟུང་ཡོད་ལ། དེང་རབས་ཀྱི་སློབ་གསོ་རིག་པའི་ལྟ་ཚུལ་གྱིས་ཟུར་བརྒྱན་ཅི་ཐུབ་དང་། རང་བྱུང་ཁོར་ཡུག་གི་ཁྱད་ཆོས་དང་སྤྱི་ཚོགས་ཀྱི་འགྱུར་རྡོག ལོ་རྒྱུས་ལྡན་པའི་ས་དང་གནས། མི་སྣ་སྙན་གྲགས་རེ་ཟུང་གི་དངོས་མིང་བེད་སྤྱོད་བྱས་ཏེ་བྱིས་སྒྲུང་གཞན་དང་ཅུང་མི་འདྲ་བའི་ཁྱད་ཆོས་སོགས་འབུར་ཐོན་ཡོད་པར་སྙམ།
མཐར། ༼རྨི་ལམ་དང་མདུན་ལམ་འཚོལ་བ་༽ཞེས་པའི་བྱིས་པའི་ཀློག་དེབ་གྲངས་ཆིག་སྟོང་ལ་ཉེ་བ་ཞིག་གཡག་རྒོད་ཀྱི་མཚན་བྱང་ཐོག་ནས་མི་རིང་བར་ཚོང་འགྲེམ་བྱེད་རྒྱུ་ཡིན་ཞིང་།། དེབ་རིན་ཆ་ཚང་མ་འོངས་གཡག་རྒོད་བོད་ཀྱི་བྱིས་པའི་སློབ་གསོའི་ལས་གཞིའི་མ་རྩ་རུ་འཇོག་རྩིས་ཡིན་པས། ལས་གཞི་འདི་ལ་དགའ་མོས་ཡོད་མཁན་དང་། བོད་ཀྱི་བྱིས་པའི་ཀློག་དེབ་གྱི་དགོས་མཁོ་ཡོད་མཁན་ཚོས་གཡག་རྒོད་དྲ་བ་བརྒྱུད་དེ་གློག་འཕྲིན་ཁ་བྱང་གཤམ་གསལ་བརྒྱུད་ནས་ང་ཚོར་འབྲེལ་གནང་རོགས།།

admin@wildyaks.com